كل اللى هتحتاجيه فى ليله الحنه

ياترى فكرتِ في الحاجات اللي إنت محتاجة ليها واللي ممكن إنك تعمليها علشان تعملي ليلة حنة يحكي ويتحاكى بيها الكل بأقل التكاليف الممكنة؟

ولا يهمك.. احنا فكرنالك..
وهنقول لك دلوقتي على كل اللي إنت هتحتاجيه...

أولا: تحديد عدد المدعوين

شوفي يا عروسة أول حاجة لازم تعمليها هي إنك تحددي عدد المدعوين اللي إنت ناوية تعزميهم على الحنة وخدي بالك إنك طبعا هتعملي الحنة دي في البيت علشان كده ياريت إن عدد المدعوين مايكونش كتير زيادة عن اللزوم واكتفي بأصحابك البنات والأقارب من الدرجة الأولى....

وحاولي إنك تحرصي على إن اللي تعزميهم دول يكونوا بنات علشان يعملوا ليكِ جو حلو.

ثانيا: تجهيز البيت لاستقبال المدعوين

شوفي يا قمر بما إنك قررتِ إنك تعملي الحنة في بيتك يبقي لازم تجهزي البيت لاستقبال الضيوف وتحددي المكان اللي هتكون فيه الحفلة واللي غالبا ما هيكون الريسبشن بتاع الشقة لأن ده أكبر مكان واسع في الشقة...

علشان كده ياريت إنك إنت وأصحابك قبل الحنة بيوم تشيلوا الحاجات اللي تخافي عليها من الكسر زي مثلا الفازات الغالية والتحف اللي بتبقى في المكان وشيلي الترابيزات الموجودة وحطي الكراسي بشكل دائري.

وسيبي المكان اللي في النص فاضي علشان ترقصي فيه إنت وأصحابك براحتك...

ثالثا: هاتي بالونات

إيه رأيك لما تعملي حاجة تدي ديكور شيك في المكان وماتاخدش مساحة كبيرة وهي إنك تجيبي بالونات كبيرة بأشكال متنوعة وتعلقيها..

وعلى فكرة كمان ممكن إنك تعملي في البالونات دي شوية أفكار زي إنك:
• تكتبي عليها بخط كبير بعض الكلمات اللي طالعة من قلبك وإنت عارفة طبعا إن أحسن الكلمات هي اللي بتكون طالعة من القلب.
• تكتبي اسمك واسم خطيبك ومعاهم تاريخ الحنة أو تاريخ أول يوم اتقابلتم فيه.
• الصقي عليها صورتك وصورة خطيبك وإنتم مع بعض.

رابعا: جهزي أكتر من كاميرا
وجهزي أغنيات على الكمبيوتر

استحالة طبعا المناسبة السعيدة دي تمر من غير ما يكون فيه حاجة تسجلها لحظة بلحظة علشان كده جهزي أكتر من كاميرا..

واستعيني باتنين من أصحابك بتكوني بتثقي في إنهم بيصوروا كويس واطلبي منهم إن كل واحدة تصور كل لقطة في الحفلة، بحيث مفيش لقطة أو منظر يعدي من غير تصوير...

وخدي بالك إنك تتأكدي بنفسك من إن البطارية مشحونة كويس وإن كل حاجة تمام.. ياريت يكون فيه أكتر من كاميراتين علشان الطوارئ...

كمان جهزي أغنيات على الكمبيوتر زي الأغنيات الخاصة بليلة الحنة وأغاني الأفراح أو أي أغاني إنت بتحبي تسمعيها واعملي لستة بيهم وحطيهم في فولدر مع بعض كلهم وسمي الفولدر ده باسم "حنة" علشان أي ظروف تلاقيهم تاني مش تقعدي تدوري من جديد..

واتأكدي إن السماعات صوتها حلو ومافيش فيها أي مشاكل...

خامسا: جهزي الحاجة الساقعة أو الشيكولاتة والذي منه..

أكيد طبعا في اليوم ده لازم تقدمي للناس اللي جاية واجب الضيافة.. بس برضه من غير ما تكلفي نفسك كتير، يعني من الآخر كده على حسب الفلوس اللي معاكِ هاتي الحاجات اللي إنت هتقدميها فممكن إنك تقدمي شوكولاتة بس أو تقدمي جاتوه وحلويات أو إنك تعملي ساندويتشات بسيطة زي مثلا ساندويتشات فراخ بانيه أو كفتة وجبنة رومي...

أو ممكن إنك تكتفي فقط بعصائر أو أي مشروبات ساقعة يعني من الآخر كده خليكِ بسيطة واللي في مقدورك اعمليه لأن الناس في الوقت ده جاية تفرح مش جاية تاكل.

وعلى فكرة لو مش فاضية تجهزي الحاجات دي ممكن توكلي المهمة دي لمامتك أو أختك الكبيرة أو واحدة من أصحابك أو أي حد يحب يخدم وياريت تكون الحاجات دي جاهزة وموجودة على السفرة بشكل منظم قبل الناس ما تيجي.

سادسا: جهزي نفسك إنتِ بقى

بعد ما اطمنتِ على كل حاجة بنفسك ادخلي أوضتك كده ومعاكِ واحدة بتثقي في ذوقها وجهزي الحاجات اللي إنت هتجيبيها يوم الحنة..

أول حاجة
أول حاجة تجهزيها هي لبسك وطبعا أكيد هتسألي نفسك وتقولي ياترى ألبس إيه.. أنا مش عارفة ومحتارة.

شوفي يا ستي أكيد إنت جبتِ في لبسك الجديد عبايات جديدة علشان كده عايزاكِ تعملي حسابك وتخلي واحدة منها في بيت والدك علشان تلبسيها في ليلة الحنة...

وياريت العباية اللي إنت هتختاريها دي يكون لونها فاتح ويكون فيها شغل وحركات كده علشان تتدلعي براحتك.. ده يومك.

ولو كنتِ مش بتحبي العبايات أو إن الحنة دي هيكون فيها مثلا ناس أغراب وعايزة تظهري قدامهم بمظهر شيك يبقى مافيش مشكلة من إنك تلبسي تونيك شيك، بس خدي بالك إن التونيك ده يكون برضه فيه شغل وتطريز.... وعادي جدا برضه إنك تلبسي فستان قماش، وممكن تعملي حسابك قبلها بفترة وتجيبي فستان سواريه علشان اليوم ده....

ودي مجموعة من العبايات المطرزة
ممكن تختاري منها </SPAN>

وعلى فكرة فيه ناس مش بتتقيد بلبس معين للحنة خاصة إذا كان اللي هيكون في الحنة بنات بس من سن بعض زي أصحابها أو قرايبها البنات فبتلاقي إن في الوقت ده بيلبسوا أي حاجة بينهم وبين بعض.

بس يا ستي.. دي كانت شوية اقتراحات تساعدك على اختيار لبسك في يوم الحنة.. تعالي نشوف هتجهزي إيه تاني...

تاني حاجة

تاني حاجة تجهزيها هي مكياجك بإنك تختاري الألوان المناسبة وماشية على لون لبسك ولون بشرتك، وخدي بالك إنك ماتكتريش علشان بشرتك ماترهقش من المكياج وإنت صابحة تعملي مكياج الفرح...

تالت حاجة

تالت حاجة جهزي الإكسسورات اللي إنت هتلبسيها وخدي بالك إن ألوانها تكون ماشية مع لبسك وإوعي تنسي إنك تحطي خرزة زرقاء في الإكسسوارات دي علشان الحسد..

سابعا: جهزي البخور

طبعا اللي هتشوف الكلمة دي هتضحك قوي بس أنا باتكلم جد.. آه جهزي البخور لأن البخور ده مهم جدا في ليلة الحنة علشان يبعد عنك عيون الحساد ويخلّي البيت ريحته حلوة...

ودي أنواع من البخور اللي بتكون قوية وريحتها بتدوم فترة طويلة.. ممكن إنك تجيبيه من عند العطار:
- العود.
- الجاوي.
- السعد.
- الصندل.
- الكافور.

بس كده خلاص.. خلص كلامنا عن الحاجات اللي ممكن إنك تعمليها علشان تعملي ليلة حنة يحكي ويتحاكى بيها الكل.

وإوعي تنسي إنك تجهزي الحاجات اللي ينفع تجهزيها قبلها بفترة كبيرة علشان أعصابك تبقى مستريحة..

وخدي بالك كمان إنك لازم في اليوم ده تخلي أعصابك هادية وبلاش توتر وتكوني نايمة كويس قبلها

وارقصي إنت وأصحابك وأهلك وافرحي براحتك من غير أي تكاليف زيادة إنت أولى بيها خاصة مع بداية الزواج..

وألف مبروك.. وزفاف سعيد.. إن شاء الله
وعقبال كل البنات..
سلام

تسلمى يا دانااااااااا

تسلك ايدك يا جميل

ميرسى يا بنات على مروركم الجميل

تسلموا لـــــــــى